Os bombeiros do parque Comarcal Provincial de Carballo recibiron onte, ás 19.21 horas, un aviso no que se lles informaba dun vehículo en chamas no punto quilométrico 26 da AG-55 (á altura da parroquia de Lemaio, concello da Laracha).
Á súa chegada ao lugar do accidente, o persoal do servizo realizou unha primeira inspección, comprobando que o automóbil estaba ardendo por completo na beiravía da autoestrata. Unha vez realizada a primeira valoración, procedeuse á sinalización, cortando o carril dereito de circulación. Para a extinción do lume empregouse auga a presión e, seguidamente, escuma para poder rematar os labores de sufocación.
O lume produciu danos no vehículo e na autoestrada, pero non houbo danos persoais. De feito, as chamas afectaron á estrutura completa do coche, agás á zona do maleteiro.
